Skessuhorn:

Lóðum undir parhús og raðhús úthlutað í Skógahverfi

7. apríl 2006

Bæjarráð Akraness úthlutaði á fimmtudag lóðum undir parhús og raðhús í fyrsta áfanga Skógahverfis. Um er að ræða 5 parhúsalóðir á einni og tveimur hæðum og 6 raðhúsalóðir fyrir hús á einni og tveimur hæðum. Alls bárust 33 umsóknir um parhúsalóðir og 48 umsóknir um raðhúsalóðir.  Sigurjón Skúlason ehf., Trésmiðjan Akur ehf., og Trésmiðja Þráins E. Gíslasonar hf. fengu úthlutað lóðum undir 31 hús við Álmskóga, Seljuskóga, Beykiskóga og Viðjuskóga og Smellinn hf. fékk úthlutað lóð undir tvö hús við Seljuskóga.

Í bókun bæjarráðs kemur fram að grundvöllur úthlutunarinnar sé heimilisfesti fyrirtækjanna á Akranesi og áralöng starfsemi í byggingariðnaði þar. Skilyrði úthlutunarinnar er að fyrirtækin selji ekki lóðirnar til þriðja aðila heldur skili þeim til endurúthlutunar ef þau hyggjast ekki nýta þær. Var bæjarstjóra falið að ganga frá sérstöku samkomulagi við fyrirtækin um lóðirnar.