Skessuhorn:

Tveir styrkir til Vesturlands

25. apríl 2006

Starfsmenntasjóður Félagsmálaráðuneytisins veitti fyrir nokkru tveimur styrkjum til verkefna á Vesturlandi. Starfsmenntaráð auglýsti í febrúar eftir umsóknum um styrki til starfsmenntunar í atvinnulífinu. Verkefni sem fólu í sér frumkvæði og nýsköpun í starfsmenntun og sem líkleg voru til að efla viðkomandi starfsgrein eða atvinnusvæði, nutu forgangs til styrkja umfram önnur. Þá var áhersla lögð á að verkefni sem sótt var um styrk til, væru vel undirbúin og umsóknir vandaðar.

Til úthlutunar voru 55 milljónir króna. Alls bárust 82 umsóknir frá 50 aðilum samtals að fjárhæð kr. 155.869.540. Samtals fengu 30 aðilar úthlutað styrk vegna 42 verkefna að fjárhæð kr. 54.625.000 og tvö verkefni á Vesturlandi hlutu styrk og stendur Símenntunarstöð Vesturlands að þeim báðum. Annars vegar hlaut verkefnið „Umhverfisvæn ferðaþjónusta-aukin fræðsla lykillinn að árangri“ styrk að upphæð 500 þúsund krónur og verkefnið „Svæðisleiðsögn á Vesturlandi“ hlaut 600 þúsund krónur í styrk.