Skessuhorn:

Elísabet verður menningarfulltrúi Vesturlands

27. apríl 2006

Menningarráð Vesturlands hefur ráðið Elísabetu Haraldsdóttur í starf menningarfulltrúa á Vesturlandi. Elísabet er myndlistarmaður og lauk námi af myndlistarbraut Listaháskóla Íslands árið 1971.  Hún er með mastersgráðu af myndlistarbraut frá Listaháskólanum í Vínarborg.  Hún hefur starfað að list sinni samhliða öðrum störfum og tekið þátt í félagsstarfi listamanna m.a. verið formaður leirlistafélagsins.  Hún hefur verið í ráðgjafahópi Handverks og hönnunar frá upphafi verkefnisins. 

Elísabet hefur starfað við kennslu frá árinu 1976 og nú síðast sem deildarstjóri og skólastjóri í Andakílsskóla á Hvanneyri.  Einnig hefur hún verið stundakennari og prófdómari við Handíðaskóla Íslands sem nú er Listaháskóli Íslands

Elísabet er fædd árið 1949.  Eiginmaður hennar er Gunnar Örn Guðmundsson og eru þau búsett á Hvanneyri. Elísabet mun hefja störf í júlí.