Skessuhorn:

Verslun Tölvuþjónustunnar í eigu nýrra aðila

28. apríl 2006

Tölvuþjónustan Securstore (TÞS) hefur selt verslunarrekstur til e-bit ehf, nýs fyrirtækis í eigu Bjarka Jóhannessonar, Eggerts Herbertssonar og TÞS.  Verslunin sem nú ber heitið Tölvuþjónustan - Verslun, verður áfram í húsnæði TÞS við Esjubraut á Akranesi og rekin með svipuðu sniði og verið hefur. “Sölu- og markaðsstarf verður þó eflt og lögð verður áhersla á mikið úrval á tæknivörum, gott verð og hátt þjónustustig,” segir m.a. í tilkynningu frá félaginu.

Verslunin er með tækni- og rekstrarvörur frá öllum helstu tæknibirgjum landsins, s.s Nýherja, EJS, Opnum kerfum, Svartækni og Apple. Viðskiptavinir geta komið í verslun og fengið ráðgjöf um “bestu kaup” frá öllum þessum aðilum. Verslunin mun áfram vera með sölu á vörum og þjónustu frá Og Vodafone og 365 ljósavakamiðum.

Eggert Herbertsson framkvæmdastjóri e-bit ehf mun hafa yfirumsjón með verslunarrekstrinum en Ólafur Sigurðsson verslunarstjóri og Einar Jónsson munu áfram sjá um daglegan rekstur.