Skessuhorn:

Deiliskipulag Borgarbrautar á byrjunarreit

4. maí 2006

Bæjarráð Borgarbyggðar samþykkti í morgun að fela umhverfis- og skipulagsnefnd að vinna nýtt deiliskipulag fyrir lóðirnar við Borgarbraut 55-59 í Borgarnesi. Þessi ákvörðun er til komin vegna athugasemda Skipulagsstofnunar vegna deiliskipulags lóðarinnar nr. 59 og óskar eiganda hússins nr. 57 um að fá að rífa það og byggja nýtt hús á lóðinni. Eins og fram hefur komið í Skessuhorni hefur mikil umræða farið fram í Borgarnesi vegna hugmynda sem uppi hafa verið um reisa 30 íbúða fjölbýlishús á lóðinni nr. 59 við Borgarbraut. Meðal annars var bæjaryfirvöldum á sínum tíma afhentur undirskriftarlisti þar sem 144 íbúar mótmæltu deiliskipulagi lóðarinnar.

Í mars lagði umhverfis- og skipulagsnefnd Borgarbyggðar til að svæðið Borgarbraut 55, 57 og 59 yrði deiliskipulagt í heild sinni áður en lengra yrði haldið. Á það féllst bæjarstjórn ekki og samþykkti fyrirliggjandi deiliskipulag fyrir lóðina nr. 59. Skipulagsstofnun gerði hins vegar nokkrar athugasemdir við deiliskipulagstillöguna og voru þær athugasemdir til athugunar hjá Borgarbyggð.

Á dögunum gerist það hins vegar að eigandi lóðarinnar að Borgarbraut 57 sendi inn erindi til sveitarfélagsins þar sem óskað var leyfis til þess að rífa hús það sem á lóðinni er og hýsti á sínum tíma verslun Bónuss. Jafnframt var óskað leyfis til að byggja á lóðinni fjölbýlishús. Í ljósi þessarar beiðni ákvað bæjarráð því í morgun að svæðið sem nær yfir lóðirnar þrjár yrði deiliskipulagt í heild sinni.

Páll Brynjarsson bæjarstjóri Borgarbyggðar segir að ósk eiganda hugmyndir eiganda lóðarinnar nr. 57 og athugasemdir Skipulagsstofnunar hafi óhjákvæmilega kallað á þá ákvörðun að skoða málið í heild sinni. Með þessari ákvörðun bæjarráðs er ljóst að byggingarframkvæmdir á lóðinni nr. 59 tefjast. Páll vildi ekki spá um hvað deiliskipulagsvinnan tæki langan tíma.