Skessuhorn:

Formaður Verkalýðsfélags Akraness sver af sér pólitísk tengsl

8. maí 2006

Formaður Verkalýðsfélags Akraness, Vilhjálmur Birgisson, birti yfirlýsingu á heimasíðu félagsins þar sem hann sver af sér tengsl við Framsóknarflokkinn á Akranesi sem og tengsl við aðra stjórnmálaflokka. Forsaga málsins er sú að á dögunum kom út blaðið Magni sem er málgagn Framsóknarflokksins á Akranesi. Í blaðinu var birt mynd af Vilhjálmi ásamt Guðmundi Páli Jónssyni og Valdimar Þorvaldssyni formanni Starfsmannafélags Akraness.

 Í yfirlýsingu Vilhjálms segir að umrædd mynd hafi verið tekin eftir fund sem framsóknarmenn héldu 1.maí og var honum boðið á þann fund þar sem hann „fór yfir það helsta sem er að gerast í verkalýðsmálum á Akranesi“ eins og segir í yfirlýsingunni.

Þá segir einnig: „ Formaður Verkalýðsfélags Akraness vill að það komi skýrt fram að hann tilheyrir engum stjórnmálaflokki hvorki Framsóknarflokknum né öðrum flokkum.  Enda er það mat formannsins að það sé andstætt hagsmunum félagsmanna Verkalýðsfélags Akraness að formaður félagsins tilheyri einum stjórnmálaflokki, þar sem félagsmenn VLFA koma úr öllum flokkum“.