Skessuhorn:

Könnun innan SHA á fylgi flokka sýnir miklar breytingar

9. maí 2006

Miklar breytingar verða í bæjarstjórn Akraness við kosningarnar í vor ef marka má skoðanakönnun sem fram fór á fylgi flokkanna meðal starfsfólks Sjúkrahússins og heilsugæslustöðvarinnar á Akranesi á dögunum. Könnun sem þessi hefur farið fram við fjölmargar undangengnar kosningar, bæði til sveitarstjórnar og Alþingis.

Á heimasíðu stofnunarinnar segir að spakir menn fullyrði að niðurstaða könnunarinnar á SHA fari iðulega nærri niðurstöðu sjálfra kosningannna. Hjá stofnuninni vinna í dag um 240 manns. Sett var upp sérstök kjördeild sem opin var í eina viku og aðeins fengu þeir að taka þátt sem kosningarétt eiga við bæjarstjórnarkosningarnar í vor.

Í könnuninni tóku þátt 134 starfsmenn og varð niðurstaðan eftirfarandi:

B-listi Framsóknarflokks fékk 14,9% og einn mann kjörinn. Tapar því einum.

D-listi Sjálfstæðisflokks fékk 36,6% og fjóra menn kjörna eins og hann hefur nú.

F-listi Frjálslynda flokksins fékk 8,2% og einn mann kjörinn. Hefur engan nú.

S-listi Samfylkingar fékk 14,1% og einn mann kjörinn. Tapar tveimur.

V-listi Vinstri hreyfingar fékk 20,9% og tvo menn kjörna. Hefur engan nú.

Auðir seðlar og ógildir voru 5,2%.

Samkvæmt þessari könnun er núverandi meirihluti Framsóknarflokks og Samfylkingar kolfallinn, fengi aðeins 2 fulltrúa en hefur 5 í dag.