Skessuhorn:

Flestir vilja Gísla S. Einarsson sem næsta bæjarstjóra

18. maí 2006

Gísli S. Einarsson nýtur yfirburðafylgis í stöðu bæjarstjóra á Akranesi ef marka má niðurstöðu könnunar sem Gallup vann fyrir Ríkissjónvarpið og birt var í gærkvöldi. Gísli S.  er sem kunnugt er bæjarstjóraefni Sjálfstæðisflokksins. Spurt var hvern kjósendur vildu sem næsta bæjarstjóra á Akranesi. Af þeim sem svöruðu sögðust 45,8% vilja sjá Gísla S. sem næsta bæjarstjóra.

Guðmundur Páll Jónsson núverandi bæjarstjóri nýtur stuðnings 19,3% kjósenda. Svein Kristinsson nefndu 7,1% kjósenda, Rún Halldórsdóttur nefndu 6,3% kjósenda og Karen Jónsdóttur nefndu 2,9% kjósenda. Um 18,5% kjósenda nefndu einhvern annan en þá sem taldir eru hér að framan.

Af þessum tölum má ráða að Gísli S. nýtur stuðnings mun fleiri kjósenda en studdu Sjálfstæðisflokkinn í könnuninni því flokkurinn hlaut fylgi 40%. Sömu sögu er að segja af Guðmundi Páli Jónssyni sem nýtur stuðnings mun fleiri kjósenda en hyggjast kjósa Framsóknarflokkinn samkvæmt könnuninni.