Skessuhorn:

Samgönguráðherra segir að framtíðarlega þjóðvegar verði um Grunnafjörð

24. maí 2006

Sturla Böðvarsson, samgönguráðherra segir lagningu vegar um Grunnafjörð eitt af þeim verkefnum sem skoðuð verði við endurskoðun núverandi langtímaáætlunar í vegamálum. Í sínum huga eigi þjóðvegurinn að liggja um Grunnafjörð fáist samþykki fyrir framkvæmdinni hjá skipulagsyfirvöldum.  Frétt Skessuhorns í síðustu viku um tvöföldun Hvalfjarðarganga og hugsanlega vegagerð um Grunnafjörð vakti talsverð viðbrögð áhugamanna um samgöngumál. Sérstaklega vöktu ummæli Jóns Rögnvaldssonar vegamálastjóra um Grunnafjörð athygli. Þar sagði að ekki hafi verið unnið að því máli um langt skeið meðal annars vegna umhverfissjónarmiða.  Þykir ýmsum sem vegamálastjóri hafi með þessum orðum nánast slegið af hugmyndir um vegagerð um Grunnafjörð.

Sú vegagerð hefur um árabil verið baráttumál sveitarstjórnarmanna á Vesturlandi og hefur samband sveitarfélaga þar ályktað um nauðsyn þessarar vegagerðar síðan 1997. Á það hefur verið bent að Grunnafjörður er friðlýstur og því muni skipulagsyfirvöldum veitast ómögulegt að heimila framkvæmdir á þessum slóðum. Friðlýsingin nær yfir fjörur og allt grunnsævi innan Hvítaness og Súlueyjar. Áhugamenn um vegagerð telja því ekkert til fyrirstöðu að leggja veg og brú utan friðunarsvæðisins auk þess sem hægt sé að veita undanþágur frá friðlýsingu ef nauðsyn krefur.  Með framkvæmdinni styttist leiðin milli Akraness og Borgarness um 7 km og leiðin frá Hvalfjarðargöngum í Borgarnes um 1 km. Með því fari þjóðleiðin til og frá suðvesturhornsinu um túnfót Akurnesinga með tilheyrandi möguleikum fyrir þjónustufyrirtæki.

Sundabraut í Norðurárdal í einkaframkvæmd?

Í ræðu á fundi á Akranesi fyrir rúmu ári síðan sagði Sturla Böðvarsson samgönguráðherra að hann teldi eðlilegt að þessi leið verði skoðuð að nýju. Í samtali við Skessuhorn segir samgönguráðherra að nú standi yfir endurskoðun langtímaáætlunar í samgöngumálum og lagning vegar um Grunnafjörð sé eitt þeirra verkefna sem skoða þurfi í því samhengi. „Ég tel eðlilegt að í framtíðinni verði vegur lagður um Grunnafjörð svo fremi að skipulagsyfirvöld heimili þá framkvæmd. Í því sambandi hef ég bent á að til greina komi að taka efri hluta Sundabrautarinnar, tvöföldun Hvalfjarðarganga og endurbyggingu Vesturlandsvegarins alla leið uppí Norðurárdal og þar með talinn veg um Grunnafjörð í einkaframkvæmd.“