Skessuhorn:

Götugrill á Borgfirðingahátíð

8. júní 2006

Borgfirðingahátíð er ólík öðrum héraðs- og bæjahátíðum því hún byggir nær eingöngu á þátttöku heimamanna. Borgfirðingahátíð er hátíð Borgfirðinga. Eins og alltaf þegar við höldum veislu þá bjóðum við gestum að njóta stundarinnar með okkur, og það á líka við um Borgfirðingahátíð; gestir eru meira en velkomnir. Þetta er helgin þegar við eigum öll að bjóða til okkar gestum til að njóta borgfirskrar menningar.

Laugardaginn 10. júní verður fjölbreytt dagskrá í Borgarnesi. Við hefjum daginn á gönguferð á fjall eða fjöru, síðan verður sögustund í Landnámssetri og að því loknu skemmtidagskrá á tjaldstæðinu. Seinnipartinn getur fólk svo valið milli einsöngstónleika, diskósunds og landnámssögu fyrir fullorðna. Og þá verða allir orðnir svangir!

Og hvað er betra þegar maður er svangur en grillveisla með nágrönnunum. Borgfirðingahátíð er hið fullkomna tækifæri til að skreyta götur og halda götugrill – ekki bara í Borgarnesi heldur út um allt hérað! Bara að skella sér í kuldagallann, brenna svolítið af kjöti og kynnast krökkunum í götunni. Og að því loknu á ball með Baggalúti.

Verið velkomin!

UMSB og Borgfirðingar