Skessuhorn:

Vænta má góðs árangurs vestlenskra stóðhesta á landsmóti

13. júní 2006

Hrossadómarar hér á landi hafa haft í nægu að snúast að undanförnu við að dæma kynbótahross fyrir Landsmót hestamanna á Vindheimamelum sem hefst í lok mánaðarins. Af landinu öllu voru sl. mánudag komin um 190 kynbótahross inn, þar af um 50 stóðhestar. Af Vesturlandi hafa nú þegar nokkuð mörg kynbótahross náð lágmarkseinkunnum og þar af nokkrir efnilegir stóðhestar og flestir þeirra með allgóðar einkunnir. Fastlega má því gera ráð fyrir að árangur vestlenskra hrossa verði góður á mótinu. Meðal stóðhesta sem þegar eru öruggir á mót má nefna Aðal frá Nýjabæ, Glym frá Skeljabrekku, Glotta frá Sveinatungu, Hróð frá Refsstöðum, Bjarma og Auð frá Lundum, Sólon frá Skáney og Þey frá Akranesi. Í næstu viku birtir Skessuhorn lista yfir vestlensku hrossin sem eru á leið á landsmótið, en síðustu dómar fara fram á Hellu nk. föstudagskvöld.