Skessuhorn:

Bjartar nætur á Vatnsnesi um næstu helgi

19. júní 2006

Sumarhátíðin Bjartar nætur verður í Hamarsbúð á Vatnsnesi laugardaginn 24. júní og hefst kl. 19:00. Þar bjóða húsfreyjurnar á Vatnsnesi gestum að mjög sérstæðu fjöruhlaðborði sem svignar undan fjölbreyttum og þjóðlegum kræsingum. Má þar nefna selkjöt, reyktan rauðmaga, signa grásleppu, súra selshreifa, grafið og reykt sauðakjöt, svartfugl og heimagert skyr. Margskonar heimabakað brauðmeti, auk fjölda annarra rétta.

Hægt er að skoða matseðilinn á http:/www.northwest.is/

Nú er liðinn rúmur áratugur frá því hátíð þessi var haldin fyrst. Ekki er ofsögum sagt að hún hafi skipað sér sérstöðu á landsvísu, enda leggja Húsfreyjurnar metnað sinn í að viðhalda gamalli matarhefð, með nýrri í bland. Í stórtjaldinu verður  bögglauppboð, tónlist, fjöldasöngur, glens og gaman.

Tvær gönguferðir með leiðsögn verða farnar þennan sama dag og eru þær inn í dagskrá Bjartra nátta. Önnur er frá Illugastöðum, fram Brandafell og endað í Hamarsbúð. Gönguleiðin er nokkuð krefjandi, hún er 13 km löng með 700 m hækkun. Af Brandafelli er mjög víðsýnt í góðu skyggni. Brottför kl. 12:00 á hádegi frá Illugastöðum. Upplýsingar gefur Guðmundur í síma 894 0695.  Hin gönguleiðin er ströndin frá Ánastaðastapa að Hamarsbúð. Um 5 km löng leið sem flestir geta gengið. Gott útsýni til Strandafjalla. Brottför kl. 16:00 frá vegvísi skammt sunnan Skarðs á Vatnsnesi.

Upplýsingar gefur Heimir í síma 451 2547.