Skessuhorn:

Mikil aðsókn að námi við LbhÍ

21. júní 2006

Mjög góð aðsókn er að námi við Landbúnaðarháskóla Íslands í ár og eru umsóknir hátt á annað hundrað talsins. Nemendur skólans á næsta skólaári verða um þrjú hundruð.

Þessa dagana er verið að meta hæfi umsækjenda, en talsverð aukning er á umsóknafjölda á milli ára og þarf að vísa frá á einstaka brautum. Flestar umsóknanna bárust í nám á umhverfisskipulagsbraut sem er fyrri hluti náms í landslagsarkítektúr og/eða skipulagsfræðum.  Sú námsbraut er ein nýrra námsbrauta við skólann, en einnig má nefna náttúru- og umhverfisfræði og skógfræði og landgræðslu auk búvísinda sem kennd hafa verið á Hvanneyri allar götur síðan 1947.  Kennsla á háskólastigi og í búfræði fer fram á Hvanneyri en garðyrkja er kennd á Reykjum í Ölfusi.

Nokkuð af þessari auknu aðsókn eru nemendur sem stunda vilja fjarnám við skólann og fer hlutfall þeirra hækkandi. Engu að síður má reikna með auknum íbúafjölda á Hvanneyri þegar kennsla við skólann hefst í haust. Alls er nú boðið upp á nám á fjórum háskólanámsbrautum við Landbúnaðarháskólann, en einnig er kennt á fimm starfsmenntabrautum í búfræði og garðyrkju á framhaldsskólastigi. Þeim sem stunda meistaranám við skólann fer nú einnig fjölgandi og skólinn er annar tveggja háskóla á landinu þar sem boðið er upp á doktorsnám.