Skessuhorn:

Sjálfstæðisflokkurinn tapar miklu fylgi í NV-kjördæmi

2. janúar 2007

Sjálfstæðisflokkurinn hefur tapað miklu fylgi og Vinstri hreyfingin-grænt framboð hefur aukið mikið fylgi sitt á undanförnum vikum samkvæmt Þjóðarpúlsi Gallup. Könnunin var unnin af starfsfólki Capacent Gallup dagana 28.nóvember til 28. desember. Samkvæmt könnuninni fengi Framsóknarflokkurinn nú 17% atkvæða nú en fékk 16% í könnun fyrir einum mánuði síðan. Sjálfstæðisflokkurinn fengi 28% atkvæða nú en fékk 35% atkvæða fyrir um mánuði síðan og hefur því tapað miklu fylgi.

Frjálslyndi flokkurinn fengi 16% atkvæða og er í sókn því fyrir mánuði síðan fékk flokkurinn 14% atkvæða. Samfylkingin fengi nú 15% atkvæða eða sama fylgi og í síðustu könnun. Vinstri-grænir fengju nú 25% greiddra atkvæða og eru í mikilli sókn því fyrir um mánuði síðan fékk flokkurinn 20% greiddra atkvæða.

Fylgi Framsóknarflokksins í Norðvesturkjördæmi er það mesta sem flokkurinn fær á landinu öllu og sömu sögu er að segja af Frjálslynda flokknum. Fylgi Sjálfstæðisflokksins í kjördæminu er það minnsta á landinu og söku sögu er að segja af fylgi Samfylkingarinnar. Aðeins í Norðausturkjördæmi er fylgi Vinstri grænna meira eða 27%.

Við síðustu Alþingiskosningar hlaut Framsóknarflokkurinn 21,7% greiddra atkvæða í Norðvesturkjördæmi, Sjálfstæðisflokkurinn hlaut 29,6% greiddra atkvæða, Frjálslyndi flokkurinn hlaut 14,2%, Samfylkingin 23,2% og Vinstri hreyfingin-grænt framboð hlaut 10,6%.