Skessuhorn:

Samfylkingin verður að sækja fylgi til óflokksbundinna

5. janúar 2007

Séra Karl V. Matthíasson, sem skipar annað sæti á framboðslista Samfylkingarinnar í Norðvesturkjördæmi, segir að þeir flokkar sem nái mestu fylgi óflokksbundinna kjósenda hljóti að lokum að standa uppi sem sigurvegarar. Flokkur sem aðeins höfði til eigin flokksmanna komist seint til áhrifa. Eins og fram kom í frétt Skessuhorns lét Valdimar Lúðvík Gíslason í Bolungarvík þau orð falla í samtalið við Ríkisútvarpið á Vestfjörðum að séra Karl hafi beitt bolabrögðum í prófkjöri flokksins og smalað óflokksbundnum mönnum til að kjósa sig.

Séra Karl segir prófkjörsreglur Samfylkingarinnar afar skýrar og í því hafi allir mátt taka þátt er lýstu yfir stuðningi við Samfylkinguna. Eftir þeim reglum hafi hann unnið eins og aðrir frambjóðendur. Það sé styrkleikamerki þegar stjórnmálamenn höfði til sem flestra. Þannig vilji hann vinna og til þess að Samfylkingin nái sterkri stöðu þurfi líka að höfða til fólks sem er óflokksbundið.

„Minn málflutningur og mín störf nutu stuðnings í prófkjörinu og fyrir það vil ég þakka fyrir og mun ég halda áfram baráttu minni í þágu fólks og byggðar minnar í Norðvesturkjördæmi“ segir séra Karl.  Telji menn að rangt hafi verið haft við í prófkjörinu hvetji hann menn til þess að hafa sambandi við formann kjörnefndar og formanns kjördæmisráðsins.