Skessuhorn:

Fasteignaskattar hækka um 12,5% á Akranesi

18. janúar 2007

Í samantekt verðlagseftirlits ASÍ, um breytingar á álagningu og gjaldskrám 15 fjölmennustu sveitarfélaga landsins, kemur fram að fasteignaskattar í fjölbýli og sérbýli á Akranesi hækkar á þessu ári um 12,5%. Mest er hækkunin í þessum sveitarfélögum 17,7% í Sveitarfélaginu Skagafirði en mest lækkar skattheimtan um 12% á Seltjarnarnesi. Hækkunin á Akranesi er tilkomin vegna 10% hækkun fasteignamats og þá hækkar álagningarstuðull fasteignaskatts um 2,5%.

Þá er einnig samanburður annarra gjalda í samantekt ASÍ. Holræsagjöld hækka um 10% á Akranesi vegna hækkunar fasteignamatsins og svo er um flest önnur sveitarfélög í samanburðinum önnur en Ísafjarðarbæ þar sem gjöldin hækka um 30%. Sorphirðugjöld hækka um 8% á Akranesi og aðeins í þremur sveitarfélögum hækka gjöldin minna. Mest er hækkunin í Ísafjarðarbæ þar sem gjöldin hækka um 45%. Á Akranesi greiða fasteignaeigendur 13.500 krónur á ári í sorphirðugjöld. Í níu sveitarfélögum eru gjöldin lægri og lægst eru þau 10.000 krónur á Seltjarnarnesi og í Skagafirði. Hæst eru þau í Ísafjarðarbæ 29.000 krónur.