 Eins og fram hefur komið í Skessuhorni er nú verið að reisa Vatnasafn í Stykkishólmi en auk þess verður á sama stað, þ.e. við Bókhlöðustíg, íbúð fyrir rithöfunda þar sem þeir fá jafnframt borguð laun fyrir ritstörf sín. Þar fá innlendir og erlendir rithöfundar tækifæri til að dvelja í sex mánuði yfir 12 mánaða tímabil og geta þeir nýtt sér viðverutímann hvenær sem er á árinu. Geta höfundarnir verið á sviði náttúruvísinda, ljóðagerðar, skáldsagna eða jafnvel kvikmynda. “Við vonumst til að þeir fái innblástur frá hinni frábæru staðsetningu Vatnasafnsins og sjái jafnframt mikilvægi þess að geta unnið, skrifað og lesið í samfélaginu hér við eyjarnar. Með þessu er skapað listrænt svigrúm fyrir listamanninn sem vonandi smitar út frá sér innan bæjarfélagsins og jafnvel út í heim.
|
Á meðan dvöl listamanns stendur í bæjarfélaginu verður óskað eftir því að viðkomandi standi fyrir skipulögðum upplestrum úr eigin verkum og jafnvel annarra höfunda. Fyrirtækið Art Angel hefur umsjón með verkefninu og hafa þeir náð samkomulagi við styrktaraðila frá Bandaríkjunum næstu fimm árin, sem mun sjá um að borga laun rithöfundanna,” sagði Erla Friðriksdóttir, bæjarstjóri í samtali við Skessuhorn. Hún segir að þriggja manna úthlutunarnefnd velji höfund sem bjóði viðkomandi að dvelja í Stykkishólmi. Býst hún við að það verði gert opinbert fljótlega hver fyrstur hreppi hnossið.
Vatnasafnið verður formlega opnað í maí og verður rithöfundaíbúðin tekin í notkun á sama tíma.
|
