 Þverhlíðingar, með Pétur Diðriksson á Helgavatni og Kolfinnu Jóhannesdóttur í Norðtungu í forsvari, hafa farið þess á leit við Byggðaráð Borgarbyggðar að það beiti sér fyrir því að gerð verði tilraun með að leggja malbik ofan á núverandi tengivegi í héraðinu sem ekki stendur til að breyta eða færa. Um yrði að ræða einbreytt malbik eða um 4 metra breitt. Að sögn Páls S Brynjarssonar sveitarstjóra Borgarbyggðar komu Þverhlíðingar að máli við byggðaráð eftir að hafa viðrað þessa hugmynd við Vegagerðina sem ekki tók ólíklega í erindið. Páll segir að sveitarstjórnin sé nú að skoða málið og þeir sem rætt hafi verið við séu jákvæðir fyrir því að gera þessa tilraun. Þó er ekki farið að tala við fjárveitingavaldið enn sem komið er.
|
„Ef af verður gæti svona framkvæmd hraðað uppbyggingu á tengivegum í héraðinu og á landsvísu. Þá kæmi einnig viðvarandi viðhald á þessa vegi sem er sannarlega til góða. Samkvæmt tölum frá Vegagerðinni fara um 70-80 bílar að meðaltali um veginn á dag og margir tengivegir hér og annars staðar eru með svipaða umferð,” sagði Páll.
Horfum til framtíðar
Pétur Diðriksson á Helgavatni sagði í samtali við Skessuhorn að allir íbúar Þverárhlíðar frá sextán ára aldri og uppúr væru fylgjandi þessari tilraun og hefðu skrifað á lista þessu til samþykkis. Verið væri að hugsa um malbik á veginn frá Norðtungubrú og niður að Borgarfjarðarbraut annarsvegar og hins vegar frá Högnastöðum, framhjá Þverárrétt og upp að Örnólfsdal. Pétur vildi taka það skýrt fram að þetta væri alls ekki hugsað sem sérverkefni fyrir Þverárhlíð. Þeim Kolfinnu hefði einfaldlega dottið þessi möguleiki í hug og því væri verkefnið merkt Þverárhlíð sem stendur. „Við, íbúarnir, höfum svo mikla tröllatrú á landsbyggðinni og lítum á bættar samgöngur sem lífsgæði. Hér er stundaður töluverður landbúnaður sem ég tel að styrki búsetuna og þeim sem eiga hér sumarbústaði finnst ekki verra að sjá líf í sveitinni. Með þessu erum við að horfa til framtíðar, hvetja fólk til að trúa á sig sjálft og umhverfi sitt. Það er sem dæmi stefna bæði á Hvanneyri og Bifröst að byggðakjarnarnir eigi að stækka, því gæti fólk búið áfram í sveitunum og sem best sótt vinnu á þeim stöðum, ef vegir eru góðir. Samgöngur hvort sem eru í lofti eða á vegi hafa líklega mest að segja um það hvort sveitirnar haldast í byggð eður ei,” sagði Pétur Diðríksson að lokum. |
