 Línubeitningabátum við Íslandsstrendur fer fjölgandi með hverju árinu. Flestir þeirra eru í eigu fiskvinnsla sem treysta á hráefni frá þessum bátum enda vita menn að gæði aflans verða ekki meiri. Að sögn framkvæmdastjóra sem gerir út einn þessara báta er auðveldara að selja línufiskinn en netafisk gæðanna vegna. Til að kynnast lífinu um borð í einum slíkum línubáti sem beitir um borð, fór Alfons Finnsson útsendari Skessuhorns í róður á einum slíkum; Grundfirðingi SH og sá hvað fram fer undir þiljum. Grundfirðingur SH 24 er gerður út frá Grundarfirði af fyrirtækinu Soffaníasi Cecilssyni og er báturinn einn af línubeitningarbátunum sem hafa verið gerður út á línu allt árið um kring hjá fyrirtækinu. Hann er 150 tonn, smíðaður í Garðabæ árið 1972, hét áður Hringur GK, en kom til Grundarfjarðar á aldamótaárinu.
|
