Skessuhorn:

Kalt vatn og fráveita kostar svipað og heitt vatn og rafmagn

1. mars 2007

Mikil hækkun fasteignagjalda í Borgarbyggð tekur á sig ýmsar myndir þegar fasteignaeigendur velta tölum fyrir sér. Í frétt í Skessuhorni á dögunum var tekið dæmi af einbýlishúsi í Borgarnesi þar sem hækkun fasteignagjalda á milli ára var ríflega 31%. Einstakir gjaldaliðir hækkuðu mun meira og í því sambandi má nefna að fráveitugjald þessa húss hækkaði um tæplega 91%. Er gjaldið nú á áttunda tug þúsunda króna á ári. Fasteignaskatturinn er tæpar 100 þúsund krónur, fyrir aðgang að vatni þarf að greiða samtals á fimmta tug þúsunda á ári, sorpgjaldið er tæpar 20 þúsund krónur og lóðarleigan hækkaði um rúm 53% á milli ára og er á fjórða tug þúsunda á ári.

Til þessa hefur einn af stóru kostnaðarliðum fasteignaeigenda verið hitun hússins og rafmagn fyrir tæki og ljós. Því er athyglisvert að velta þeim kostnaðarlið fyrir sér í áðurnefndu húsi. Síðustu tólf mánuði hefur rafmagnsnotkun í húsinu kostað tæpar 70 þúsund krónur og hitun hússins hefur kostað rúmlega 60 þúsund krónur. Vatn er í hugum landsmanna óþrjótandi og ódýrt. Í hugum fólks hefur heldur ekki verið talið að það geti verið kostnaðarsamt að nýta fráveitur.

Hjá umræddum húseiganda í Borgarnesi er það nú svo að aðgangur að köldu vatni og fráveitu kostar nú svipaða upphæð og hiti og rafmagn hússins. Fasteignagjöldin í heild eru í þessu tilfelli tvöfalt hærri upphæð en greitt er fyrir rafmagn og kyndingu. Trúlega hefði það einhvern tímann þótt saga til næsta bæjar.