 Síðastliðinn laugardag var Samfés keppnin haldin í Laugardalshöll, en það er söngvakeppni félagsmiðstöðva út um allt land sem heldur keppnina. Fulltrúi Vesturlands í keppninni, Eva Margrét Eiríksdóttir, fulltrúi félagsmiðstöðvarinnar Óðals og nemandi í Kleppjárnsreykjaskóla gerði góða hluti í keppninni og varð í öðru sæti með lagið sitt Engill. Eva Margrét segir upplifunina frábæra frá keppninni og sérstaklega hafi verið gaman að syngja í höllinni, þar sem hljómburðurinn er jafn góður og raun ber vitni. Vinkonur hennar þær Kristrún Sveinbjörnsdóttir og Katrín Sigurðardóttir dönsuðu undir söng Evu Margrétar og skiluðu þær sínu hlutverki með sóma.
|
„Áður en ég steig á svið, spurði þulurinn mig hvort ég myndi flytja rólegt lag eður ei og þar sem ég jánkaði því bað hann alla í salnum að kveikja á símunum sínum og halda á lofti. Laugardalshöllin var því upplýst af símum meðan ég flutti lagið og stemningin alveg mögnuð,“ segir Eva Margrét, að vonum kát með árangurinn. Í fyrsta sæti í keppninni varð Herdís Rútsdóttir með lagið Heyr mína bæn, en Herdís kemur frá Hvolsvelli og keppti fyrir félagsmiðstöðina Tvistinn. Í þriðja sæti í keppninni voru fulltrúar Þebu í Kópavogi. Dómarar í keppninni voru Friðrik Ómar söngvari, Lára Rúnarsdóttir tónlistarmaður, Óli Palli á Rás2, Biggi söngvari Ampop og Regína Ósk söngkona.
Á myndinni er Eva Margrét með dansarana Kristrúnu og Katrínu til sitthvorrar handar.
|
