Skessuhorn:

Atvinnusköpun í dreifbýli

20. mars 2007

Konur í Borgarfirði, Dölum og Snæfellsnesi eiga það meðal annars sammerkt með kynsystrum sínum um allt land að vera á námskeiðum til að læra um atvinnusköpun í dreifbýli. Um tvö námskeið er að ræða, annarsvegar um landbúnaðartengda ferðaþjónustu og hinsvegar um heimavinnslu og -sölu afurða.

Það er Lifandi landbúnaður, grasrótarhreyfing kvenna í dreifbýli, sem stendur fyrir námskeiðunum en samstarfsaðilar eru Landbúnaðarháskóli Íslands og Bændasamtök Íslands. Þessir þrír aðilar fengu styrk frá Leonardo sjóði Evrópusambandsins til að auka menntun kvenna í dreifbýli.

Að sögn Ragnhildar Sigurðardóttur, verkefnisstjóra Lifandi landbúnaðar er námið að mestu unnið í fjarnámi í gegnum vef sem sérstaklega var útbúinn til að kenna konum í dreifbýli, út um alla Evrópu. Mörg fleiri námskeið eru í boði en í þetta sinn voru einungis þessi tvö þýdd yfir á íslensku og virðist mikill áhugi vera fyrir þeim.

Mynd: Konur af Snæfellsnesi og Borgarfirði sóttu fyrirlestur Guðrúnar Bergmann í Valfelli um atvinnusköpun í dreifbýli.