Skessuhorn:

BNT kaupir lóðir, hús og fyrirtæki á Akranesi

28. mars 2007

Nýlega festi eignarhaldsfélagið BNT kaup á húsi Akranessdeildar Rauðakross Íslands við Þjóðbraut 11 en fyrir átti félagið Essóstöðina Skútuna við Þjóðbraut 9 og Hjólbarðaviðgerðina sf við Dalbraut 14, sem er á samliggjandi lóð við hinar tvær. Þessar þrjár samliggjandi athafnalóðir mynda stórt svæði með góðri staðsetningu sem býður upp á ýmsa möguleika.  Samkvæmt heimildum Skessuhorns eru uppi hugmyndir um byggingu fjölþjónustufyrirtækis fyrir bíleigendur. Bílanaust hefur á undanfarandi misserum markvisst verið að kaupa rekstur hjóbarðafyrirtækja á höfuðborgarsvæðinu, samanber kaup á Bæjardekki, Dekki.is og Hjólbarðaverkstæðinu Dekkinu og virðist sem félagið stefni að aukinni starfsemi á landsbyggðinni.

“Enn sem komið er liggja ekki fyrir neinar áætlanir um breytta nýtingu á svæðinu á Akranesi milli Dalbrautar og Þjóðbrautar og óvíst hvenær það verður endurskipulagt fyrir breyttan rekstur,” segir Heimir Sigurðsson framkvæmdastjóri fasteignafélags BNT í samtali við Skessuhorn. Að öðru leyti vildi hann ekki tjá sig um framtíðaráform fyrirtækisins.

Eignarhaldsfélagið BNT var stofnað árið 2006 þegar hluthafar og stjórnendur Bílanaustar hf ásamt nokkrum fjárfestum keyptu allt hlutafé í Olíufélaginu ehf. og sameinuðu rekstur félaganna undir BNT hf. sem á allt hlutafé í báðum félögunum. Eftir samrunann störfuðu um 700 manns hjá þessum fyrirtækjum og var samanlögð áætluð velta yfir 30 milljarða króna árið 2006.