Skessuhorn:

Borgarbyggð samþykkir niðurgreiðslu vegna tónlistarnáms

7. maí 2007

Sveitarstjórn Borgarbyggðar hefur samþykkt að íbúar sveitarfélagsins geti sótt um niðurgreiðslur á námskostnaði vegna tónlistanáms utan Borgarbyggðar. Framhaldsnám í tónlistarskólum hefur ekki verið niðurgreitt af ríkinu eins og annað framhaldsnám. Því hafa þeir nemendur sem hyggjast stunda nám á því sviði utan sinnar lögheimilissveitar lent í vandræðum vegna þess að greiðslur í viðkomandi skóla þurfa að koma frá opinberum aðilum. Lengi hefur verið reynt að fá menntamálaráðuneytið til að taka tónlistarnám upp á sína arma en árangur ekki verið í samræmi við erfiði. Mörg sveitarfélög hafa því brugðist við vandanum á sama hátt og Borgarbyggð gerir nú. Í reglum sem Borgarbyggð hefur sett vegna niðurgreiðslanna segir meðal annars:

„Íbúar með lögheimili í Borgarbyggð, sem leggja stund á sérhæft tónlistarnám utan sveitarfélagsins, geta sótt um niðurgreiðslu námskostnaðar. Skilyrði er að viðkomandi sé í fullu tónlistarnámi. Heimilt er að niðurgreiða tónlistarnám fyrir nemendur á aldrinum 4 til 25 ára. Heimilt er að niðurgreiða framhaldsnám í almennum tónlistarskólum í allt að sex annir. Borgarbyggð niðurgreiðir ekki tónlistarnám á háskólastigi.“ Einnig kemur fram að styrkir eru misháir eftir því hvar viðkomandi nemandi er staddur í náminu. Lægstu styrkir eru veittir til fornáms en þeir hæstu til framhaldsstigs eða 240 þúsund á vetri.