Skessuhorn:

Axlar Björn snýr aftur ýmsum til hrellingar

23. maí 2007

Um helgina stóð yfir fjölumdæmisþing Lionsmanna í Ólafsvík. Meðal dagskrárliða á því var óvissuferð fyrir maka þingfulltrúa umhverfis Snæfellsjökul. Farið var með rútu og var Sæmundur Kristjánsson í Rifi leiðsögumaður í þeirri ferð en fáir eru einmitt fróðari um söguna í Snæfellsbæ. Farið var yfir Fróðarheiði og á leiðinni sagði Sæmundur sögur af Axlar Birni sem uppi var á 16. öld en samkvæmt henni átti hann að hafa myrt 18 manns. Sagði Sæmundur að reist hefði verið stytta af Axlar Birni og yrði stoppað við Öxl í Breiðuvík þar sem gestir áttu að varpa grjóti fyrir fætur hans en með því segir trúin að Axlar Björn verði betri maður þar sem hann nú dvelur. Áður en farið var af stað höfðu Lionsmenn fengið Gústaf Geir Egilsson pípulagningameistara og leikara til þess að að klæðast gervi Axlar Bjarnar, semsagt að leika styttuna og var hann hinn ógnvænlegasti á að líta.

Er ferðamenn komu á svæðið við bæinn Öxl, þar sem Björn mun hafa átt heimili sitt, hafði Gústaf stillt sér upp og var ekki til setunnar boðið að hrekkja gesti og gerði hann það ótæpilega eins og Sæmundur hafði beðið hann um. Grjóti var kastað fyrir fætur styttunar. Einn gestanna hafði komið heldur nálægt styttunni og hvæsti þá Axlar Björn dimmum ógnandi rómi: “Farðu, farðu!” Átti þessi kona fótum fjör að launa og mátti heyra hræðsluhróp hennar umhverfis allan Snæfellsjökul og langt út á Breiðafjörð. Stökk Axlar Björn þá af stalli sínum og hélt áfram að hrella gesti sem sáu þó fljótlega að grín væri í gangi og tóku því vel enda var þeim fljótlega boðið upp á blóðheitan drykk til að hressa við sálina.

Haldið var áfram för um Snæfellsjökul og komið m.a. við á Djúpalónssandi þar sem tekið var á móti gestum með grillveislu sem búið var að koma fyrir á svæðinu.

Sjá fleiri myndir af axarsköftum Axlar Bjarnar í Skessuhorni sem kemur út í dag.