Skessuhorn:

Hugmyndafræði All Senses hlýtur Frumkvöðlaverðlaun Vesturlands

31. maí 2007

Frumkvöðlaverðlaun Vesturlands voru afhent í dag í annað sinn. Í ár var það hugmyndafræði All Senses hópsins á Vesturlandi sem hlaut þau. Það eru Samtök sveitarfélaga á Vesturlandi sem veita verðlaunin. All Senses er svokallaður klasahópur ferðaþjónustuaðila sem byggir á þeirri hugmyndifræði að samvinna sé vel framkvæmanleg í samkeppni. Það var Sigríður Finsen, stjórnarformaður Samtaka sveitarfélaga á Vesturlandi sem tilkynnti um úrslitin. Hún sagði í ræðu sinni að hugmyndafræði All Senses Group væri merki um samvinnu grasrótarinnar sem með góðu skipulagi og stýringu virkaði vel.

Sérstök dómnefnd fór yfir þær tilnefningar sem bárust, en að þessu sinni voru þær 20 eða helmingi fleiri en á síðasta ári. Það sem einkum er horft til þegar valið fer fram er nýnæmi í framkvæmdum, atvinnulífi eða félagslífi. Hversu mikið framfaraskref verkefnið er fyrir landshlutann og hversu mikið áræði og fyrirhyggju þurfi til að hrinda hugmyndinni í framkvæmd.

Aðrir sem hlutu tilnefningar voru:

Múlavirkjun ehf, Andrés Konráðsson, Eyrbyggja, Gísli Einarsson, Arnheiður Hjörleifsdóttir, María Guðrún Nolan, Víngerðin í Borgarnesi, Smellinn ehf, Ísagn ehf, Guðrún Bergmann, Runólfur Guðmundsson, Skipavík, Ásgeir Valdimarsson, Reykofninn Grundarfirði, Haukur Þórðarson, Hótel Glymur, Ásmundur E. Daðason, Landnámssetrið og Tölvuþjónustan SecureStore.

Verðlaunagripurinn var gerður af Oddnýju Þ. Bragadóttur í Kristý í Borgarnesi. 

Á myndinni eru þeir sem voru tilnefndir til verðlauna ásamt Þórdísi Arthúrsdóttur sem heldur á verðlaunagripnum góða fyrir hönd All Senses Group.