Skessuhorn:

Brautskráð frá Bifröst

12. júní 2007

Brautskráning stúdenta frá Háskólanum á Bifröst fór fram á laugardaginn. Að þessu sinni luku 35 nemendur BS prófi, þrír meistaraprófi, einn post graduate diploma úr viðskiptadeild og 14 diplómaprófi í fjármálum og stjórnun. Þá luku 50 nemendur prófum úr frumgreinadeild. Tveir nemendur luku BA prófi frá félagsvísindadeild í heimspeki, hagfræði og stjórnmálafræði, HHS og eru það fyrstu nemendurnir til að ljúka slíku prófi hér á landi en kennsla í HHS hófst á Bifröst haustið 2005. Námið, sem  byggt er upp að breskri fyrirmynd, hefur rutt sér til rúms í fleiri löndum á undanförnum árum. Ágúst Einarsson rektor kom víða við í útskriftarræðu sinni en henni verða gerð ítarlegri skil á síðum Skessuhorns á morgun.

Fjöldi nemenda var heiðraður fyrir framúrskarandi árangur, en verðlaun þeirra sem enn eru í námi felast í því að þeir fá felld niður skólagjöld á næstu önn. Guðmundur Ágúst Sæmundsson úr félagsvísindadeild fær skólagjöldin felld niður að fullu og einnig þeir Vilmar Freyr Sævarsson úr lagadeild og Benedikt Helgason úr viðskiptadeild. Þá fá nokkrir nemendur skólagjöldin felld niður að hluta.

Bókaverðlaun fyrir hæstu einkunn á lokaprófi í einstökum deildum hlutu Hjálmar Elíeserson í félagsvísindadeild, Halldór Örn Þorsteinsson í viðskiptadeild, Árni Gísli Árnason í lagadeild og Sæmundur Rúnar Þórisson í meistaranámi. Þá hlaut Jóhannes Geir Sigurgeirsson verðlaun fyrir framúrskarandi árangur í post graduate diploma námi í viðskiptadeild og Kristín Atladóttir fyrir bestu meistararitgerðina. Árni Sverrir Hafsteinsson, Friðrik Páll Sigurðsson og Ingvar Christiansen náðu bestum árangri í frumgreinadeild, Árni Sverrir fær skólagjöld felld niður á næstu önn og þeir Friðrik og Ingvar tilheyrandi afslátt. Halldór Örn Þorsteinsson fékk peningaverðlaun frá SÍS fyrir hæstu einkunn á lokaprófi og Árni Gísli Árnason frá VÍS fyrir hæstu einkunn á lokaprófi í lagadeild.