Skessuhorn:

Sumarhátíðin Bjartar nætur um næstu helgi

22. júní 2007

Um Jónsmessuna hefur á annan áratug verið haldin vegleg sumarhátíð í Hamarsbúð á Vatnsnesi. Að þessu sinni verður umrædd hátíð haldin á morgun, laugardaginn 23. júní og hefst kl. 19. Þetta er orðinn árviss atburður þar sem Húsfreyjurnar á Vatnsnesi framreiða margs konar sælkerarétti sem sumir hverjir eru afar fáséðir á borðum landsmanna. Mikið er lagt upp úr að matföngin á hlaðborðinu séu allt í senn; fjölbreytt, sérstök og í fyrsta gæðaflokki svo flestir geti fundið eitthvað við sitt hæfi í mat og drykk. Fjöruhlaðborðið er löngu landsþekkt og sækja gestir þangað um langan veg til að njóta þeirrar sérstöðu sem þarna er boðin. Áhugasömum skal bent á að matseðillinn er birtur á www. northwest.is

Fastur liður í sumarhátíðinni eru tvær áhugaverðar gönguferðir sem farnar eru þennan sama dag og endar göngufólk ferðirnar við fjöruhlaðborðið. Önnur er frá Þorgrímsstöðum, fram Miðtungu niður með Hlíðarfjalli að Hamarsbúð. Af Vatnsnesfjalli er mjög víðsýnt í góðu skyggni. Gönguleiðin er krefjandi. Brottför verður kl. 12:00 á hádegi frá Þorgrímsstöðum. Upplýsingar gefur Þóra Kristín í síma 451 2668.  Hin gönguleiðin er ströndin frá Stöpum að Hamarsbúð. Um 7 km löng leið sem flestir geta gengið.Gott útsýni til Strandafjalla. Brottför kl. 16:00 frá Stöpum.Upplýsingar gefur Jónína í síma 846 7636.