Skessuhorn:

Stór hundasýning í Víðidal um helgina

21. júní 2007

Árleg sumarsýning Hundaræktarfélags Íslands fer fram nú um helgina 23.- 24. júní, í reiðhöll Fáks í Víðidal og hefst klukkan kl. 9.00 laugardag og sunnudag. Sýningin er langstærsta sumarsýning sem haldin hefur verið á Íslandi þar sem um 640 hundar eru skráðir til leiks af 75 tegundum. Fjórir erlendir dómarar frá Svíþjóð, Portúgal, Rússlandi og Möltu koma til landsins til að dæma hundana. Þar að auki kemur frá dómari frá Danmörku sem mun dæma unga sýnendur. Öflugt barna- og unglingastarf er starfrækt innan félagsins og mikil gróska innan þess, að þessu sinni taka 39 ungir sýnendur þátt í keppni ungra sýnenda á aldrinum 10-17 ára.

Tilgangur hundasýninga er að dæma hundana út frá ræktunarmarkmiði hverrar tegundar. Í anddyri reiðhallarinnar verða glæsilegir kynningarbásar um ólíkar hundategundir. Þar gefst gestum og gangandi kostur á að kynnast hundunum og ræða við hundeigendur auk þess sem á staðnum verða fjöldinn allur af sölu- og kynningarbásum þar sem ýmis tilboð verða í gangi.

Nánari upplýsingar um dagskrá sýningarinnar er er að finna á vefsíðu Hundaræktarfélags Íslands, www.hrfi.is. Ef óskað er frekari upplýsinga má gjarnan hafa samband við undirritaða.

Meðfylgjandi er mynd af besta hundi marssýningar 2007, tíkin er af tegundinni Shetland sheepdog og heitir Aha Hot Fine Fairydream sýnandi er Þorbjörg Ásta Leifsdóttir, einn sigursælasti ungi sýnandinn hérlendis. Ásamt henni er dómarinn Johan Juslin frá Finnlandi og Jóna Th. Viðarsdóttir formaður Hundaræktarfélags Íslands. Eigandi tíkarinnar er Vignir Sigurðsson.

Ljósmyndari: Johan Frick-Meijer