 Bæjarlífið á Akranesi er litskrúðugara en venjulega þessa stundina því í bænum er fjöldi stráka úr sjöunda flokki sem tekur þátt í Kaupþingsmótinu. Búist var við um 2.000 gestum og munu margir þeirra gista í Brekkubæjarskóla. Mótið hófst á skrúðgöngu frá stjórnsýsluhúsinu niður á íþróttasvæðið við Jaðarsbakka þar sem mótið var sett. Ljóst var af andlitum strákanna að spennan var gífurleg, ekki síður fyrir skrúðgöngunni en fótboltanum. Á myndinni má sjá Skagastrákana arka káta niður á Jaðarsbakka. Mótið stendur alla helgina og verður slitið á sunnudaginn.
|
