 Skorradalshreppur hefur fest kaup á nýjum slökkviliðsbíl af Ford gerð sem afhentur var síðastliðinn föstudag. Það er Sigurjón Magnússon í Ólafsfirði sem smíðaði og afhenti bílinn Davíð Péturssyni oddvita og er verðið ríflega 16 milljónir króna. Eftir er að semja um það hvar bíllinn verður staðsettur. Bílinn sem um ræðir er vel útbúinn. Hann er með öflugu spili, GPS tæki, 2100 lítra vatnstanki auk 130 lítra froðutanks. Mest afköst dælu er 2200 lítrar á minútu og froðubúnaður á háþrýstingi 1-6%. Bíllinn kemur til viðbótar vatnsdælu í jeppakerru sem staðsett hefur verið í Skorradal síðustu árin.
|
Í Borgarfirði hafa verið tvö slökkvilið, annað í Borgarbyggð og hinsvegar Slökkvilið Borgarfjarðardala. Í því síðarnefnda hefur Pétur Jónsson verið slökkviliðsstjóri. Nú stendur til að sameina þessi slökkvilið í eitt þar sem þeir hreppar sem stóðu að slökkviliði Borgarfjarðardala hafa allir sameinast í Borgarbyggð utan Skorradalshrepps. Að sögn Davíðs Péturssonar oddvita á Grund stóð til að afhenda bílinn Slökkviliði Borgarfjarðardala til rekstrar en fljótlega verður það lagt niður svo ekkert hefur verið ákveðið enn. „Það er lítið gagn í bílnum hér heima á hlaði svo fljótlega kemur í ljós hver kemur til með að reka hann,“ sagði Davíð. Aðspurður hvar bíllinn yrði staðsettur svaraði hann því til að það hafi ekki verið ákveðið. „Við munum verða í samstarfi við Brunamálastofnun sem væntanlega mun segja til hvar best er að staðsetja bílinn. Sumarhúsaeigendur í Skorradal hafa sent áskorun til hreppsnefndar um að byggt verði yfir bílinn hér í hreppnum en ekkert hefur þó verið ákveðið í þeim efnum enn,“ sagði Davíð.
Pétur Jónsson, slökkviliðsstjóri Slökkviliðs Borgarfjarðardala, sagði að bíllinn yrði staðsettur á Hvanneyri. „Hann þarf að vera hjá fólkinu,“ sagði Pétur og bætti við að Hvanneyri væri þéttbýlasti staðurinn á þessum slóðum og því væri eðlilegt að staðsetja slökkvibílinn þar.
Ljósm. Pétur Davíðsson. |
