Skessuhorn:

Mest aukning hlutafélaga á Vesturlandi

4. febrúar 2008

Samkvæmt hagtíðindum Hagstofu Íslands um nýskráningu hlutafélaga og einkahlutafélaga má ætla að mesta gróska í atvinnuuppbyggingu hafi orðið á Vesturlandi á síðasta ári. Þar fjölgaði nýskráningum hlutfallslega langmest, eða um 45% frá fyrra ári og voru að þessu sinn 40 fleri en árið áður. Nýskráð hlutafélög í landshlutanum voru 136 á síðasta ári en voru 94 árið 2006.  Mestur fjöldi nýskráninga einkahlutafélaga á Vesturlandi á síðasta ári var í tengslum við smábátaútgerð, eða 17 talsins. Þá komu félög sem stofnuð voru varðandi rekstur eignarhaldsfélaga. Þau félög voru 15 og félög um leigu atvinnuhúsnæðis eru 12 talsins. Sex félög voru stofnuð vegna leigu á vinnuvélum og jafnmörg um húsbyggingar. Félög um fjórar hárgreiðslu- og snyrtistofur voru stofnuð á Vesturlandi á árinu, jafnmörg um  hrossarækt, blandaða búfjárrækt og einnig voru fjórir matsölustaðir settir á stofn í landshlutanum.

Í landinu öllu voru nýskráð hluta- og einkahlutafélög 3.674 á síðasta ári og hefur nýskráningum fjölgað um rúm 15% frá árinu 2006 þegar 3.191 ný félög voru skráð. Hlutfallsleg skipting nýskráninga á atvinnugreinar er nokkuð jöfn á milli ára, en ef nýskráningar eru skoðaðar eftir landsvæðum eru tæplega 72% nýskráðra félaga með lögheimili á höfuðborgarsvæðinu.