 |
| Viðgerðir á húsi við Merkigerði | Björgunarfélag Akraness og slökkvilið staðarins fékk fjölda útkalla í gær þegar ein dýpsta lægð vetrarins gekk yfir með tilheyrandi foki. Meðal þess tjóns sem tilkynnt var um má nefna að klæðning losnaði af húsi við Höfðasel, rúður brotnuðu í gróðurhúsum, hjólhýsi fauk og skemmdist við Ægisbraut og rúða brotnaði í húsi við Suðurgötu. Björgunarfélag Akraness sinnti í gær um 20 útköllum vegna veðursins og voru þau af ýmsum toga. Meðal annars var óveðurstrukkur sveitarinnar notaður við að ferja starfsmenn Norðuráls úr Borgarnesi til og frá vinnu en vegurinn undir Hafnarfjalli var lokaður í gærkvöldi vegna ofsaroks. Þar fór vindmælir í 62 metra á sekúndu í hviðum en sló í kjölfarið út um níuleytið í gærkvöldi og er enn óvirkur. Einnig fengu starfsmenn Járnblendiverksmiðjunnar aðstoð við að komast til og frá vinnu þar sem ekki var ferðaveður fyrir venjulega bíla á þjóðveginum í nágrenni Grundartanga.
|
