Skessuhorn:

Íbúar kæra starfsleyfi til Laugafisks

12. febrúar 2008

Hópur íbúa í nágrenni Laugafisks á Akranesi leggur á morgun fram kæru til umhverfisráðuneytis vegna nýsamþykkts starfsleyfis fyrirtæksins til 12 ára. Guðmundur Sigurbjörnsson talsmaður hópsins segir vinnubrögð heilbrigðisnefndar Vesturlands ekki í takt við raunveruleikann. Nefndin slaki á í kröfum gagnvart fyrirtæki sem gert var brottrækt úr öðru sveitarfélagi á sínum tíma á sömu forsendum, vegna mengunar, og það hafi ekki náð að bæta úr því í starfsemi sinni á Akranesi. "Í Njarðvík voru þó 400-500 metrar í íbúðabyggðina en aðeins 150 á Akranesi," segir Guðmundur.

Guðmundur segir að það segi sína sögu gagnvart Laugafiski, að málefni fyrirtæksins hafi komið við sögu á nánast öllum fundum heilbrigðisnefndar frá árinu 2003. Það segi einnig mikið um vinnubrögð heilbrigðisnefndar Vesturlands.

Þegar íbúar kærðu bráðabirgðastarfleyfi til Laugafisks á síðasta ári, tók þrjá mánuði að fá úrskurðinn. Guðmundur segir að svona mál séu lengi að fara í gegnum kerfið, þó að gengið sé út frá því að úrskurður muni berast innan sex vikna, þá vilji það dragast.