Skessuhorn:

Konudagurinn er í dag

24. febrúar 2008

Í gær lauk Þorra. Konudagurinn er því í dag en það er jafnframt fyrsti dagur góu samkvæmt fornu íslensku tímatali. Í dag er við hæfi að menn gefi ástinni sinni blóm eða litla gjöf til tákns um ást sína. Áður fyrr áttu húsfreyjur að fagna góu á sama hátt og bændur fögnuðu fyrsta degi í þorra. Þær áttu að fara fyrstar allra á fætur, ganga út fáklæddar fyrsta morgun í góu og bjóða hana velkomna með eftirfarandi vísu: 

Velkomin sértu, góa mín,

og gakktu í bæinn;

vertu ekki úti í vindinum

vorlangan daginn.