 Mikil eftirspurn hefur verið eftir miðum á sýningu Brynhildar Guðjónsdóttur – BRÁK, sem leikin hefur verið fyrir fullu húsið á Sögulofti Landnámsseturs síðan um áramót. Um helgina ber þó svo við að nokkur sæti hafa losnað vegna forfalla. Svo virðist sem fólki hrísi hugur við að leggja land undir fót þegar veður eru válynd. “Því hvetjum við Borgfirðinga til að nota tækifærið og sjá þessa sýningu sem hefur fengið svo mikið lof gagnrýnenda á meðan færi gefst. Aðeins eru örfá sæti laus á sýningar í apríl og miðar í maí eru að seljast upp. Fólk er greinilega bjartsýnna á að komast í Borgafjörð með vorinu,” segir í tilkynningu frá Landnámssetri. Þar er hægt að fá nánari upplýsingar.
|
