 „Það er hiti í fólki og því er misboðið hvernig fjallað er um málið,“ segir Elís Þór Sigurðsson trúnaðarmaður kennara við Grundaskóla á Akranesi. Elís segir að kennurum hafi fundist það kaldar kveðjur sem fólust í ályktun meirihluta bæjarstjórnar Akraness á dögunum, þar sem það er gefið í skyn að bæjarstjórninni sé ókunnugt um að mikið álag sé á kennurum skólanna, þrátt fyrir að skólanefnd hafi nýverið komið þeim skilaboðum áleiðis til bæjarstjórnar að of margir nemendur séu í dag í Grundaskóla, Brekkubæjarskóli sé fullsetinn og því full þörf á byggingu nýs grunnskóla í Skógarhverfi.
|
Elís segir að kennurum beggja skólanna blöskri þessi tvískinnugur, sem hann kallar, að það skuli vera formaður skólanefndar, Eydís Aðalbjörnsdóttir, sem stendur fyrir þessari ályktun meirhluta bæjarstjórnar. Elís segir að svo heitt hafi verið í kennurum, að hluti kennaraliðs Brekkubæjarskóla hafi ákveðið að á fundi sínum í fyrradag að ganga ekki í forfallakennslu eða taka yfirvinnu. „Aðrar aðgerðir hafa ekki verið ákveðnar af hálfu kennara, en fyrsti dagur eftir páskafrí er starfsdagur og ég býst við að fólk taki þann dag til að ræða þessi mál,“ segir Elís.
Eydís Aðalbjörnsdóttir formaður skólanefndar, segir að þarna sé verið að blanda saman tveimur hlutum. Í tillögu skólanefndar hafi verið tilgreind þrengsli í skólunum, aukinn nemendafjöldi kallaði á meira húsnæði. Skólanefndin hefði brugðist við því með því að leggja til að Selið við Garðasel, sem áður var nýtt sem tvær skólastofur í FVA, myndi færast til Grundaskóla til notkunar næsta haust. Það var samþykkt og nú eru skólastjórnendur að finna út hvernig þeir geti nýtt húsnæðið sem best. „Erindi kennara er borið upp án þess að greinargerð hafi borist frá skólastjórum grunnskólanna né sviðsstjóra Akraneskaupstaðar um aukið álag á kennara og hvernig væri hægt að mæta því, eða hvort það væri nú þegar gert með yfirvinnugreiðslum,“ segir Eydís Aðalbjörnsdóttir.
Þegar kallað var eftir upplýsingum um yfirvinnugreiðslur til grunnskólakennara á Akranesi kemur fram að á síðasta ári jukust þær um tæpar tvær og hálfa milljón í Grundaskóla, enda var fjölgun barna mest þar á árinu. Hinsvegar minnkuðu yfirvinnugreiðslur til kennara Brekkubæjarskóla um tæpar fimm milljónir króna á síðasta ári frá árinu á undan.
|
