 Í tengslum við nauðasamninga vegna Borgarnes kjötvara ehf., sem greint er frá í frétt hér á síðunni í gær, hefur verið ákveðið að hinir nýju eigendur reki ekki stórgripasláturhúsið í Brákarey áfram. Eins og kunnugt var starfsmönnum sláturhússins sagt upp störfum fyrr í vetur og hefur engin stórgripaslátrun verið síðan í Borgarnesi. Gunnar Þ. Gíslason stjórnarformaður Sundagarða hf. sem eru hinir nýju eigendur BK segir að þeir auglýsi hér með eftir aðila til að opna og reka sláturhúsið. Eins og staðan er í dag er ekkert sláturhús með leyfi til slátrunar á öllu Vesturlandi. Gunnar Þ. Gíslason segir að hann hafi fundið fyrir áhuga á því að þessi þjónusta yrði áfram á svæðinu. „Við auglýsum því hér með eftir aðila til að opna sláturhúsið að nýju og reka það. Við erum með leigusamning á húseigninni til tveggja ára og leyfið og tæki til sláturnar eru til staðar. Ég á ekki von á öðru en eigendur væru til í að framlengja þann samning ef einhverir framtaksamir einstaklingar sýndu áhuga á þessum rekstri.“
|
Aðspurður hvort einhverjir myndu kaupa afurðir frá svona sláturhúsi sagði Gunnar að hann teldi allar líkur á því að afurðastöðvar myndu gera það. „Ef við höldum ekki áfram með grillkjötið sem Borgarnes kjötvörur seldu, myndum við ekki kaupa lambakjöt, en án efa værum við tilbúnir að kaupa nautakjöt frá þeim sem myndu slátra í Brákarey. Nú er bara að hvetja fólk til að skoða þetta og hafa samband,“ sagði Gunnar.
|
