Skessuhorn:

Undirbúningur nýs grunnskóla hafinn

25. mars 2008

Eins og sagt var frá í síðasta Skessuhorni hefur skólanefndin á Akranesi eindregið mælt með því að hafinn verði undirbúningur að byggingu þriðja grunnskólans í bæjarfélaginu. Bæjarráð Akraness hefur nú samþykkt tillögur skólanefndar um að hafist verði handa um undirbúning nýs grunnskóla í Skógarhverfi. Af þeim sökum hafa skólanefndarfulltrúar, bæjarstjóri og starfsmenn fræðslusviðs skoðað nokkra nýja skóla. Hafa þessir aðilar heimsótt Ingunnarskóla í Reykjavík, Hraunvallaskóla í Hafnarfirði og Sunnulækjarskóla í Árborg. Einnig var teikning og hugmyndafræði að Norðlingaskóla skoðuð.

Á heimasíðu Akraneskaupstaðar sagði rétt fyrir páska að framundan sé að rýna betur í teikningar og hugmyndafræði en tillaga skólanefndar gerir ráð fyrir að fyrsti áfangi að nýjum skóla verði tilbúinn haustið 2009 og þá hefjist kennsla yngstu barnanna í Flata- og Skógahverfi.