 “Það er nánast ómögulegt að vinna upp 25 stiga mun á móti svona sterku liði,” sagði Ken Webb þjálfari Skallagríms eftir að Borgnesingar töpuðu 95:106 í Grindavík í gærkveldi í fyrstu viðureign liðanna í 8-liða úrslitum Icelandic Express deildarinnar.
Páll Axel Vilbegsson skaut Skallana nánast í kafi í fyrri hálfleik þegar Grindavík náði mest 24 stiga forystu. Með mikilli baráttu og góðum leik í seinni hálfleik náðu Skallagrímsmenn að minnka muninn niður í þrjú stig við upphaf síðasta fjórðungs, en lengra komust þeir ekki og Suðurnesjamennirnir unnu sanngjarnan sigur.
|
Darrel Flake var atkvæðamestur hjá Skallagrími með 29 stig, Zekovic gerði 21, Axel Kárason 12, Allan Fall 10, Pétur Sigurðsson 8, Áskell Jónsson 7, Pálmi Sævarsson 4 og Miftari 2. Hjá Grindavík var Páll Axel langstigahæstur með 36 stig, Dorboe gerði 17 og átti 11 stoðsendingar, Williams 14 og Helgi Jónas Guðfinnsson 13.
Ástæða er til að hvetja Borgfirðinga nær og fjær til að fjölmenna á annan leik liðanna sem fram fer í Borgarnesi annað kvöld. Nú er að duga eða drepast... |
