Skessuhorn:

Fagna hugmyndum um Markaðsstofu Vesturlands

3. apríl 2008

Á aðalfundum Upplýsinga- og kynningarmiðstöðvar Vesturlands og Ferðamálasamtaka Vesturlands sem haldnir voru í Stykkishólmi í gær var lýst stuðningi við hugmyndir um stofnun fyrirtækis um rekstur Markaðsstofu Vesturlands. Hugmyndin snýst um að stofna fyrirtæki um markaðsmál ferðaþjónustu í landshlutanum og hefur undirbúningshópur á vegum Vaxtarsamnings Vesturlands verið að störfum í vetur til að leggja drög að stofnuninni. Með þessu fyrirkomulagi er vonast til að einfalda megi skipulag í markaðsmálum og ekki síst sameina krafta fólks sem starfar í ferðaþjónustu á Vesturlandi þannig að koma megi skýrari verkaskiptinu og vinnslu allra verkefna innan þessa geira.

Á aðalfundunum var rætt um undirbúning fyrir sumarið og stilltir saman strengir. Búist er við talsverðri umferð innlendra sem erlendra ferðamanna í ár og vita bókanir á gott að sögn þeirra sem rætt var við.