Skessuhorn:

Vilja byggja Bjössaróló upp sem menningarverðmæti

14. apríl 2008

Á síðasta fundi umhverfis- og landbúnaðarnefndar Borgarbyggðar var rætt um mikilvægi þess að halda við því einstaka útivistarsvæði í Borgarnesi sem kallað hefur verið Bjössaróló. Nefndarmenn voru sammála um að svæðið þyrfti að byggja upp sem menningarverðmæti.

Ingibjörg Daníelsdóttir formaður nefndarinnar segir að Bjössaróló geti ekki fallið undir þær reglur sem gilda um leiksvæði almennt og því þurfi frekar að skilgreina hann sem útivistarsvæði.

„Okkur finnst alveg nauðsynlegt að þessu skemmtilega svæði verði haldið við. Bæði er staðsetningin afar sérstök og eins hitt að það er gaman fyrir krakka að sjá hvernig er hægt að nota efnivið á margvíslegan hátt. Hins vegar er rólóinn gerður úr timbri sem er forgengilegra en margt annað og því er viðhaldið mikið. Okkur datt helst í hug að reyna að leita eftir styrkjum hjá fyrirtækjum og í fleiri digra sjóði til nauðsynlegra endurbóta og viðhalds og finna síðan einhvern hagann einstakling til að halda svæðinu við.“

Bjössaróló heitir eftir höfundi sínum og hugsmiði, Birni Guðmundssyni, sem bjó við svæðið og byggði það upp. Til þess nýtti hann efnivið sem kannski hefði ekki komið að notum annars.