Skessuhorn:

Áhyggjur af fyrirhuguðum innflutningi landbúnaðarvara

21. apríl 2008

Sveitarstjórn Borgarbyggðar samþykkti samhljóða á fundi sínum 17. apríl ályktun Finnboga Rögnvaldssonar þar sem lýst er áhyggjum vegna fyrirhugaðrar aukningar á innflutningi landbúnaðarafurða hingað til lands.

“Sveitarstjórn Borgarbyggðar lýsir áhyggjum vegna yfirlýsinga einstakra ráðherra um innflutning landbúnaðarafurða. Ljóst er að hvers konar tilslakanir koma verst niður á atvinnulífi á landsbyggðinni, bæði hjá bændum og í úrvinnslugreinum. Sökum þess hversu íslenskur markaður er lítill og landið einangrað er mikilvægt að allar stærri ákvarðanir á þessu sviði séu teknar á grundvelli langtímastefnumörkunar þar sem tekið er tillit til atvinnulífs, matvælaöryggis, byggðaþróunar og stöðu alþjóðlegra matvælamarkaða. 

Jafnframt minnir sveitarstjórn á að innflutningur á hráu kjöti skapar hættu á búfjársjúkdómum sem valdið hafa evrópskum landbúnaði miklum búsifjum á undanförnum árum.”