 Fótboltasumarið er í þann mund að hefjast með öllu sem því tilheyrir. Af því tilefni er fjallað ítarlega um boltann í Skessuhorni sem kemur úr prentun síðar í dag. Meðal efnis eru viðtöl við þjálfara knattspyrnuliða ÍA, Skallagríms, Snæfells og Víkings í Ólafsvík þar sem spáð er í spilin fyrir komandi leiktíð. Einnig er að finna ítarlegt viðtal við knattspyrnuhetjuna Ríkharð Jónsson þar sem hann rifjar meðal annars upp gamla tíma. Þá er rætt við alþingismanninn Magnús Stefánsson sem í eina tíð gerði garðinn frægan með Víkingsliðinu.
„Markmiðið hjá okkur fyrir sumarið er klárt. Við ætlum að efla stöðu okkar frá síðasta ári. Nú erum við á fleiri vígstöðvum en síðasta sumar. Ef við verðum ennþá inni í Evrópukeppni þegar Íslandsmótið er búið, með góða útkomu þar og í bikarkeppninni, þá er það mjög ásættanleg niðurstaða. Liðið er mun betur statt núna en í fyrra. Markviss þjálfun í eitt og hálft ár er að skila sér. Ungu strákarnir hafa þroskast í rétta átt og hópurinn er sterkari í heildina,“ segir Guðjón Þórðarson þjálfari Skagaliðsins meðal annars í spjalli.
| 
