Skessuhorn:

Malbikað á Snæfellsnesi um næstu mánaðamót

8. maí 2008

Í Snæfellsbæ og Grundarfirði er þessa dagana verið að byrja á frágangi gatna og plana vegna malbikunarframkvæmda sem byrjað verður á um næstu mánaðamót. Þá kemur malbikunarfyrirtækið Hlaðbær Colas úr höfuðborginni með færanlega steypustöð sem sett verður niður á Nesinu. Seinast var malbikað á Snæfellsnesi í hitteðfyrra. Sem fyrr eru aðalframkvæmdirnar í Grundarfirði og Snæfellsbæ, lítilsháttar í Stykkishólmi.

Að sögn Guðmundar Inga Gunnlaugssonar bæjarstjóra í Grundarfirði liggur endanleg ákvörðun ekki fyrir hversu mikið verði malbikað, en lagt verður á 16 til 22 þúsund fermetra. Áætlaður  kostnaður vegna malbikunar hjá Grundarfjarðarbæ er á bilinu 35-50 milljónir króna. Mestmegnis er um að ræða yfirlögn á götur. Áformað er að lagt verði á Hrannarstíg, Eyrarveg, Sólvelli, Nesveg, Hlíðarveg, Fossahlíð og Hamrahlíð. Einnig verða malbikuð plön hjá fyrirtækjum í Grundarfirði sem og í Snæfellsbæ.

Kristinn Jónasson bæjarstjóri í Snæfellsbæ segir að á vegum sveitarfélagsins verði malbikaðir tíu þúsund fermetrar. Þar á meðal á þrjár götur; Miðbrekka, Fossbrekka og Brautarholt. Einnig verður malbik lagt á hafnarsvæðin á Ólafsvík og Rifi og bílaplön við grunnskólann á Hellissandi.