Skessuhorn:

Heldur minni umferð í maí

11. júní 2008

Umferð um Hvalfjarðargöng var tæpum þremur prósentum minni í nýliðnum maímánuði heldur en í sama mánuði í fyrra. Marinó Tryggvason hjá Speli sagðist ekki geta fullyrt um eina ástæðu umfram aðra. Vissulega væri eldsneytisverð í hæstu hæðum en einnig yrði að horfa til þess að minni framkvæmdir væru í landinu. Til dæmis væri byggingaframkvæmdum á Grundartanga nærri lokið og sama væri að segja um virkjunar- og stóriðjuframkvæmdir á Austurlandi. Þetta hefði ásamt ýmsu fleiru áhrif á umferð um Hvalfjarðargöng. Sumarumferð ferðamanna væri rétt að byrja þannig að ekki væri gott að segja um framhaldið.

“Það verður fróðlegt að sjá hvernig júnímánuður kemur út. Eftir þennan mánuð getum við kannski farið að átta okkur á framhaldinu en þetta eru óneitanlega viðbrigði fyrir okkur. Hingað til hefur umferðin alltaf verið að aukast en nú sjáum við aðrar tölur,” sagði Marinó Tryggvason.