 Kvennalið Snæfells kom sér upp úr neðsta sæti Icelandic Express deildarinnar í körfubolta í gærkveldi þegar það lagði Fjölni örugglega 80:43 í Hólminum eftir að staðan í hálfleik var 32:14 fyrir heimaliðið. Berglind Gunnarsdóttir var atkvæðamest hjá Snæfelli með 18 stig, Kristen Green gerði 16, Gunnhildur Gunnarsdóttir 14, Björg Einarsdóttir 6, Sara S. Andrésdóttir 5, Helga Björgvinsdóttir 5, Ellen Högnadóttir 5, Sara Mjöll Magnúsdóttir 5, Unnur Ásgeirsdóttir 4 og María Björnsdóttir 2.
Þetta var barátta neðstu liðanna í deildinni, en eitt fellur í vor. Snæfell styrkti stöðu sína í deildinni, er með 4 stig og Fjölnir er neðstur með 2 stig. Eftir þessum úrslitum að dæma þarf talsvert að gerast hjá Grafarvogsliðinu ef það ætlar að ná fleiri stigum í vetur.
|
