Í dag verða greidd atkvæði um það hvort Ísland eigi að hefja aðildarviðræður við Evrópusambandið á grundvelli samningsumboðs frá Alþingi. Tekið er fram að tryggja þurfi sérstaklega hagsmuni sjávarútvegs og landbúnaðar.
Þetta er þrítugasta flokksþing Framsóknar og ljóst að þetta verður þing breytinga. Afdrifaríkar ályktanir liggja fyrir fundinum. Stærstu ályktanirnar eru um Evrópumál og tillaga um stjórnlagaþing. Á átakafundi í nóvember var ákveðið að flýta flokksþingi og um leið var umræðu um Evrópumálin frestað. Þingfulltrúar munu í dag greiða atkvæði um ályktun um aðildarviðræður við Evrópusambandið og er búist við heitum umræðum um málið.
Á morgun verður svo rædd ályktun um stjórnlagaþing en samkvæmt henni er lagt til að stjórnskipun Íslands verði endurskoðuð á sérstöku stjórnlagaþingi. Stjórnarskráin verði þar endurskoðuð í samræmi við hugmyndir um stjórnskipan landsins.
| 
