Skessuhorn:

Landnámssetur og Sögumiðstöð tilnefnt til Eyrarrósar

5. febrúar 2009

Við greindum frá því hér á vefnum í gær að Sögumiðstöðin í Grundarfirði hefði verið tilnefnd til hinna eftirsóttu verðlauna; Eyrarrósarinnar. Ekki fylgdi þá sögunni að annað fyrirtæki á Vesturlandi var einnig tilnefnt, en það er Landnámssetrið í Borgarnesi. Nú hefur það sumsé komið á daginn og verður tilkynnt um hver hlýtur verðlaunin við athöfn á Bessastöðum næstkomandi þriðjudag. Þriðja fyrirtækið sem tilnefnt var er Skaftfell, miðstöð myndlistar á Austurlandi. Eyrarrósin er veitt árlega fyrir eitt afburða menningarverkefni á starfssvæði Byggðastofnunar. Þrjú verkefni eru valin úr hópi umsækjenda og þau kynnt sérstaklega.  

Meðal markmiða með Eyrarrósinni er að auka kynningarmöguleika einstakra sveitarfélaga og landshluta, gefa íbúum landsins kost á afburða alþjóðlegum listviðburðum og skapa sóknarfæri á sviði menningartengdrar ferðaþjónustu. Bæði Landnámssetur Íslands og Sögumiðstöðin Eyrbyggja í Grundarfirði eru afar vel að þessum tilnefningum komin og óskar Skessuhorn forsvarsmönnum þeirra til hamingju.