Skessuhorn:

Útskrifuðust úr grunnnámi skólaliða í Búðardal

12. febrúar 2009

Sjö nemendur útskrifuðust síðastliðinn fimmtudag úr námsleiðinni “Grunnnám skólaliða” eftir nám hjá Símenntunarmiðstöðinni á Vesturlandi í Búðardal. Fjórir nemenda komu frá leikskólanum Vinabæ en þrír sóttu nokkurn spöl í námið því þeir komu frá leikskólanum Hólabæ á Reykhólum. Námskeiðið var samtals 70 kennslustundir og skiptist í níu námsþætti sem voru: Sjálfsstyrking, uppeldi og umönnun, agi og reiðistjórnun, matur og næring, samskipti, fötluð börn og börn með sérþarfir, leikur og skapandi vinna, slysavarnir og skyndihjálp og tölvu- og upplýsingatækni.

Leiðbeinendur á námskeiðinu segja hópinn hafa verið samheldinn og góður andi hafi ríkt. Nemendur hafi almennt verið mjög ánægðir með námskeiðið. Þá sögðu nemendur að námið myndi nýtast þeim vel í starfi og í eigin lífi, til dæmis við uppeldi á eigin börnum.